Şu gün paýtagtymyzda Türkmenistanyň Söwda-senagat edarasynyň guramagynda Türkiýe Respublikasynyň eksport harytlarynyň sergisi açyldy. Ol bilen “Meridyen Uluslararsi Fuarсilik” türk kompaniýasy bilen hyzmatdaşlykda guraldy.
Gözden geçirilişe gatnaşmak üçin Türkiýäniň döwlet düzümleriniň wekillerinden ybarat uly wekiliýet topary, ýurdumyz bilen netijeli hyzmatdaşlygy has-da ösdürmäge gyzyklanma bildirýän 100-e golaý kompaniýanyň we hususy kärhananyň ýolbaşçylarydyr hünärmenleri Aşgabada geldiler. Öz mümkinçiliklerini we öňdebaryjy tehnologiýalaryny Türkmenistanda ilkinji gezek tanyşdyrýan önüm öndüriji kompaniýalar sergä gatnaşyjylaryň agramly bölegini düzýär. Olaryň köpüsi ýurdumyzyň köpugurly ykdysady kuwwaty barada oňat habarlydyrlar we hyzmatdaşlygy giňeltmegi maksat edinýärler.
Serginiň açylyş dabarasyna Hökümet agzalary, ministrlikleriň we pudaklaýyn dolandyryş edaralarynyň ýolbaşçylary, ýurdumyzda işleýän diplomatik wekilhanalaryň, köpçülikleýin habar beriş serişdeleriniň wekilleri hem-de işewürler gatnaşdylar.
Forumyň açylyş dabarasynda çykyş eden türk wekiliýetiniň ýolbaşçysy, Türkiýe Respublikasynyň wise-prezidenti Jewdet Ýylmaz Türkmenistanda maýa goýumlaryň möçberlerini artdyrmaga we gurluşyk taslamalary arkaly bu ýurduň döwrebaplaşdyrylmagyna Türkiýäniň goşant goşmaga taýýardygyny mälim etdi.
Köpugurly sergi türk önüm öndürijileri tarapyndan eksport edilýän ýokary hilli önümleriň giň toplumyny – senagat we oba hojalyk pudaklary üçin enjamlaýyn düzümleri, gurluşyk serişdelerini, hojalyk we elektronika tehnikalaryny, öý hojalyk harytlaryny, dokma önümlerini we beýlekileri tanyşdyrýar.
