Birleşen Arap Emirlikleriniň prezidenti Muhammed ben Zaid Al Nahaýýan BMG-niň global howa çözgütlerini durmuşa geçirmek üçin 30 mlrd dollar möçberli täze gaznanyň döredilendigini habar berdi. Muny TASS ýetirýär.
Ol bu barada Dubaýda BMG-niň Howanyň üýtgemegi baradaky Çarçuwaly konwensiýasynyň taraplarynyň 28-nji konferensiýasynyň esasy çäresi bolan Bütindünýä howa sammitiniň açylyş dabarasynda aýtdy. Onuň belleýşi ýaly, täze gaznanyň döredilmegi howanyň üýtgemegine garşy göreş çärelerini maliýeleşdirmekdäki “boşlugy aradan aýyrmak” zerurlygy bilen baglanyşyklydyr. Mundan başga-da, prezident bu başlangyjyň 2030-njy ýyla çenli 250 mlrd dollar maýa goýum çekmäge gönükdirilendigini belledi.
Alterra adyny alan täze gazna howa üýtgemelerine garşy göreşde dünýädäki iň uly hususy maýa goýum mehanizmine öwrüler. Alterra-nyň müdirler geňeşine ýolbaşçylyk etjek COP28-iň başlygy Sultan ben Ahmed al-Jaberiň beýanyna görä, gazna “zyňyndy derejesi nol we howanyň üýtgemegine durnuklylygy bolan ykdysadyýete geçişi çaltlaşdyrmak üçin uly potensiala eýe bolan uly möçberli howa maýa goýumlaryna” 25 mlrd dollar gönükdirer. Galan 5 mlrd dollary global Günorta ýurtlaryna maýa goýumlary çekmek üçin gönükdirilen mehanizmiň çäklerinde ulanmak göz öňünde tutulýar.
Alterra-nyň hyzmatdaşlary beýleki howa gaznalaryna 6,5 mlrd dollar bermäge borçlanan BlackRock, Brookfield we TPG maýa goýum kompaniýalary boldy. Al-Jaberiň aýtmagyna görä, Alterra-nyň hyzmatdaşlary beýleki institusional maýadarlardan goşmaça kapitaly çekmäge ünsi jemlär. Bu serişdeleriň hasabyna, esasanam, 2025-nji ýyla çenli ösüp barýan ýurtlarda umumy kuwwaty 1,2 GWt bolan Gün we ýel elektrik stansiýalaryny gurmak meýilleşdirilýär.
