Aşgabatda Türkmenistanyň we Owganystanyň demirýol edaralarynyň ýolbaşçylarynyň arasynda gepleşikler geçirilýär. Oňa gatnaşmak üçin Owganystanyň demirýol müdirliginiň başlygy Baht-ur-Rahman Şarafat 30-njy noýabrda türkmen paýtagtyna geldi.
Işjeň duşuşygyň gün tertibinde Owganystandaky demir ýollaryň gurluşygy, dolandyrylyşy we tehniki hyzmaty, “Lapis - Lazuli” (Lazuli geçelgesi) halkara ulag geçelgesi boýunça ýükleriň daşalyşyny işjeňleşdirmek baradaky meseleler ara alnyp maslahatlaşylýar diýip, Orient habar berýär.
Dört gün dowam etjek ýygnak örän netijeli esaslarda dowam edýär; taraplara tehniki hyzmatdaşlygyň birnäçe çärelerini ylalaşmak başartdy, ony ösdürmekde utgaşyklylygy gowulandyrmak üçin bilelikdäki komitet döretmek kararyna gelindi.
Hususan-da, ozal türkmen gurluşykçylary tarapyndan çekilen 30 kilometrlik Akina-Andhoý demir ýol şahasyny dowam etdirmek, uzynlygy 10 km bolan Andhoý-Şibirgan böleginiň gurluşygy, şeýle hem Turgundy-Hyrat we Turgundy-Sanabar demir ýol taslamalaryna garaldy.
Ikitaraplaýyn söwdanyň we Owganystanyň beýleki Merkezi Aziýa ýurtlary bilen söwdasynyň göwrümini artdyrmak maksady bilen, demir ýol arkaly ýük dolanyşygyny artdyrmak mümkinçiliklerine aýratyn üns berildi.
Owganystanyň demirýol pudagynyň ýolbaşçylary Türkmenistan bilen Lapis -Lazuli ulag geçelgesini (Owganystan-Türkmenistan-Azerbaýjan-Gruziýa-Türkiýe) ösdürmäge we üstaşyr geçiş kuwwatyny ýokarlandyrmak hem-de beýleki ýurtlardan, şol sanda Hindistandan we Päkistandan ýük akymlaryny çekmek üçin täsirli multimodal ulag shemalarynyň döredilmegine uly gyzyklanma bildirdi.
