Wise-premýer B.Annamämmedow Aşgabadyň täze baş meýilnamasyny işläp taýýarlamagyň çäklerinde Türkmenistanyň Prezidentiniň garamagyna taýýarlanylan teklipleri hödürledi.
«Watan» habarlar gepleşiginde habar berlişi ýaly, wise-premýer B.Annamämmedow Aşgabat şäherini yzygiderli ösdürmäge we halkymyzyň ýaşaýyş-durmuş derejesini has-da ýokarlandyrmaga gönükdirilen maksatnamalary üstünlikli durmuşa geçirmek boýunça alnyp barylýan giň gerimli işler barada hasabat berdi.
Bellenilişi ýaly, medeni-durmuş we önümçilik maksatly binalaryň hem-de desgalaryň yzygiderli gurulmagy netijesinde paýtagtymyzyň çägi barha giňeldilýär.
Serdar Berdimuhamedow hasabaty diňläp, paýtagtymyz Aşgabadyň günsaýyn özgerýändigini, tehnologiýanyň soňky gazananlarynyň şäher durmuşyna giňden ornaşdyrylýandygyny belledi. Şunuň bilen baglylykda, wise-premýere Aşgabat şäheriniň 2045-nji ýyla çenli döwür üçin baş meýilnamasy işlenip taýýarlananda, ylmyň we tehnikanyň täze gazananlaryndan, öňdebaryjy halkara şähergurluşyk tejribesinden ugur alynmagyny üpjün etmek tabşyryldy. Munuň özi ak mermerli paýtagtymyzy ösdürmekde esasy talap bolmalydyr diýip, döwlet Baştutanymyz nygtady.
