2023-nji ýylyň 27-nji noýabrynda Türkmenistanyň Pakistan Yslam Respublikasyndaky ilçihanasy PYR-yň Parahatçylygy öwreniş we diplomatiýa instituty bilen bilelikde Gündogaryň beýik akyldary we şahyry Magtymguly Pyragynyň 300 ýyllygyna bagyşlanan “Magtymguly Pyragy we häzirkizaman dünýäsinde halklaryň dostlugy” atly ylmy-amaly maslahat geçirdi. Bu barada ýurduň daşary syýasy edarasyna salgylanyp, «Türkmenistan: Altyn asyr» habar berýär.
Maslahatda eden çykyşynda Pakistanyň hökümetiniň Miras we medeniýet işleri boýunça federal ministri Saýed Jamal Şah Magtymguly Pyragynyň baý mirasyna ýokary baha berip, medeni-ynsanperwer ugurda ýurtlarymyzyň arasyndaky hyzmatdaşlygy mundan beýläk-de giňeltmegiň maksadalaýykdygyny aýtdy.
Türkmenistanyň Pakistandaky ilçisi A.Möwlamow öz çykyşynda Türkmenistanyň Prezidentiniň dünýä edebiýatynyň altyn hazynasyna girýän Magtymguly Pyragynyň edebi mirasyny öwrenmek başlangyjynyň halkara hyzmatdaşlygy giňeltmekde möhüm ähmiýete eýe boljakdygyny, şol bir wagtyň özünde häzirki ylmy-amaly maslahatyň 2024-nji ýylda Magtymguly Pyragynyň 300 ýyllygyny bellemäge mynasyp goşantdygyny belledi.
Maslahata gatnaşyjylar bu çäräniň ähmiýetini belläp, medeni-ynsanperwer ugurda ikitaraplaýyn hyzmatdaşlygy pugtalandyrmagy dowam etdirmek islegini mälim etdiler.
