Aşgabatda azerbaýjan halkynyň milli lideri Geýdar Aliýewiň doglan gününiň 100 ýyllygyna bagyşlanylyp, “Geýdar Aliýew – Azerbaýjanyň we Türkmenistanyň doganlygy” atly konsert geçirildi. Bu barada Azerbaýjanyň Türkmenistandaky ilçihanasyna salgylanyp, Report agentligi habar berýär.
Konsertde azerbaýjan halk aýdymlary, şeýle-de kompozitorlaryň aýdymlary ýaňlandy.
Bu çärä bilelikdäki azerbaýjan-türkmen hökümetara komissiýasynyň egindeş başlyklary – Azerbaýjanyň ykdysadyýet ministri Mikail Jabbarow we Türkmenistanyň Ministrler Kabinetiniň başlygynyň orunbasary Batyr Atdaýew, Türkmenistanyň resmi şahslary, daşary ýurtlaryň ilçileri, şeýle-de jemgyýetçiligiň we KHBS-iň wekilleri gatnaşdy.
Gatnaşyjylar Aşgabatda gurnalan “Geýdar Aliýew – Azerbaýjanyň we Türkmenistanyň doganlygy” atly surat sergisi bilen hem tanyşdylar. Sergide beýik lider Geýdar Aliýewiň durmuşynyň we işiniň dürli döwürlerini, şeýle-de Azerbaýjan bilen Türkmenistanyň arasyndaky diplomatik gatnaşyklary görkezýän suratlar hödürlendi.
