Eýran Yslam Respublikasynyň Yspyhan şäherinde Türkmenistanyň Medeniýet günleri geçirildi. 23 — 25-nji noýabry aralygynda dowam eden Medeniýet günleri birnäçe medeni çäreleri öz içine aldy.
Türkmenistanyň Medeniýet günleriniň ilkinji güni ýurdumyzyň amaly-haşam sungat eserleriniň, hem-de muzeý gymmatlyklarynyň sergisiniň açylyş dabarasy boldy. Şol gün medeniýet we sungat ussatlarymyzyň konserti hem geçirildi.
Medeniýet günleriniň ikinji güni ýurdumyzyň ösüşlerini, milli gymmatlyklaryny açyp görkezýän sergi dowam etdirildi. Şol gün iki dostlukly ýurtduň ýazyjydyr şahyrlarynyň, alymlarynyň gatnaşmagynda gatnaşmagynda Gündogaryň beýik akyldary we nusgawy şahyry Magtymguly Pyragynyň döredijiligine bagyşlanan döredijilik duşuşygy geçirildi.
Mundan başga-da, Yspyhan şäherinde geçirilen Türkmenistanyň Medeniýet günleriniň çäklerinde «Istärin» hem-de «Gyzyl kürte» ýaly filmler hem dabara gatnaşyjylara görkezildi. Belläp geçsek, «Istärin» filmi akyldar şahyrymyzyň döredijiligine bagyşlanan, «Gyzyl kürte» bolsa uruş ýyllaryna bagyşlanan filmlerdir.
Ýurdumyzyň Yspyhanda geçirilen Medeniýet günleriniň çäklerinde medeniýet we sungat işgärleri Yspyhan şäheriniň gözel ýerlerine, taryhy ýadygärliklerine, medeni ojaklaryna gezelenç etdiler diýip, Türkmenistanyň Medeniýet ministrligi habar berdi.
