Fransiýaly gyzjagaz Zoi Klozýur «Çagalaryň Ýewrowideniýesi» halkara aýdym-saz bäsleşiginde ýeňiji boldy. Bu barada BFMTV kanaly habar berdi.
13 ýaşly Klozýur 228 utuk toplap, ispaniýaly (201 utuk) we ermenistanly (180 utuk) bäsdeşlerinden öňe geçdi. Gyz mekdepdäki azar bermeler hakda öz döreden Coeur diýen aýdymy bilen sahna çykdy.
“Bu beýlekileri kemsidýänleriň pikirini üýtgeder diýip umyt edýärin. Biz - azar berilýänler ýeňijidiris, muňa olaryň düşünmegini isleýärin" – diýip, ol ýeňiş gazanandan soň aýtdy.
Jemleýji konsert 26-njy noýabrda Fransiýanyň Nissa şäherindäki “Nikaýyň köşgi” konsert zalynyň sahnasynda geçdi. 2023-nji ýylda bäsleşige 16 ýurtdan ýaş ýerine ýetirijiler gatnaşdy.
«Çagalar Ýewrowideniýesi» 2003-nji ýyldan bäri Ýewropa ýaýlym bileleşiginiň (EBU) agzalary bolan ýurtlardan 9 ýaşdan 14 ýaş aralygyndaky ýaş ýerine ýetirijileriň arasynda geçirilýär. 2020, 2022 we 2023-nji ýyllarda bäsleşikde fransuzlar ýeňiji boldular.
