27-28-nji noýabrda Kazanda Yslam Hyzmatdaşlyk Guramasynyň ýurtlarynyň II Ýaşlaryň ylmy kongresi geçirilýär. Kongrese 25 ýurtdan, şol sanda Türkmenistandan, 150-ä golaý ýaş alymlar we gözlegçiler gatnaşýar.
Ýaşlaryň ylmy hyzmatdaşlygy Russiýa bilen Yslam Hyzmatdaşlyk Guramasynyň ýurtlarynyň arasyndaky gatnaşyklaryň ösmeginde möhüm ähmiýete eýedir diýip, kongresiň açylyş dabarasynda Russiýanyň Ylym we ýokary bilim ministriniň orunbasary Denis Sekirinskiý belledi. Muny TASS ýetirýär.
2023-nji ýylda kongresiň işi şu ugurlara gönükdirilendir: häzirkizaman biolukmançylyk we biotehnologiýa meseleleri, häzirkizaman halkara gatnaşyklary we halkara hukugy, häzirkizaman bilim tehnologiýalary, binagärlik, dizaýn, sungat, geologiýa we nebitgaz tehnologiýalary.
Kongresiň hünärmenleri hökmünde KFU-nyň alymlary hem-de Ylmy we tehnologiki hyzmatdaşlyk boýunça hemişelik komitet, Bilim, ylym we medeniýet meseleleri boýunça Yslam guramasy, Yslam sungatyny we medeniýetini öwreniş merkezi, Yslam Hyzmatdaşlyk Guramasynyň Ýaşlar forumy ýaly halkara guramalaryň wekilleri çykyş edýär. Kongresiň işi Kazan federal uniwersitetiniň bäş ýerinde geçirilýär. Kongresiň işiniň jemi boýunça materiallar ýygyndysy çap ediler.
Türkmenistan bilen bir hatarda bu kongrese Azerbaýjan, Bangladeş, Müsür, Indoneziýa, Iordaniýa, Eýran, Gazagystan, Kamerun, Gyrgyzystan, Liwan, Marokko, Mozambik, Niger, Nigeriýa, Pakistan, Palestina, Russiýa, Senegal, Siriýa, Täjigistan, Tunis, Türkiýe, Özbegistan we Çad döwletleri gatnaşýar.
