Şu gün, 25-nji noýabrda agşam Aşgabatda Kuraş boýunça XIV dünýä çempionatynyň açylyş dabarasy geçirildi.
Ol Olimpiýa şäherçesiniň desgalarynyň düzümine girýän Başa-baş söweş sungaty sport toplumynda guraldy.
Sport toplumynyň meýdançasyna dünýä çempionatyna gatnaşyjy ýurtlaryň Döwlet baýdaklary getirildi. Olar meýdançada hatara düzüldi.
Dabaraly ýagdaýda Prezident Serdar Berdimuhamedowyň Gutlagy okaldy.
Kuraş boýunça dünýä çempionaty açyk diýlip yglan edildi.
Soňra Halkara Kuraş assosiasiýasynyň (IKA) prezidenti Haýdar Farmana söz berildi. Ol ýygnananlara ýüzlenip, hemmeleri Türkmenistanyň ajaýyp paýtagty Aşgabatda geçirilýän Kuraş boýunça dünýä çempionatynyň açylyş dabarasynda görýändigine örän şatdygyny nygtady.
Bu ýaryşy geçirmek üçin türkmen tarapynyň iň amatly şertleri döredendigini, şol sanda ajaýyp sport desgalaryny ýaryşlara taýýarlandygyny nygtap, jenap Haýdar Farman sportuň kuraş görnüşini sportuny ösdürmäge goşan ägirt uly goşantlary we goldawlary üçin IKA-nyň adyndan Prezident Serdar Berdimuhamedowa hem-de türkmen halkynyň Milli Lideri Gahryman Arkadagymyza çuňňur hoşallyk bildirdi.
Dabaranyň resmi açylyşy tamamlanandan soňra, gatnaşyjylara gargy tüýdüginiň owazy astynda türkmen tebigaty, ýurdumyzyň milli gymmatlyklary we baýlyklary barada wideorolik görkezildi.
Şeýlelikde, Kuraş boýunça dünýä çempionaty başlandy. Janköýerlere erkekleriň arasynda ýedi, zenanlaryň arasynda hem sekiz agram derejelerinde gyzykly tutluşyklara tomaşa etmek garaşýar.
