Emeli aň dürli kesellere, şol sanda rak keseline garşy göreşde immuniteti güýçlendirýän täze täsirli immunomodulýatorlary kesgitlemäge kömek etdi.
Çikago uniwersitetiniň Pritzker molekulýar inženerçilik mekdebiniň (PME) alymlary derman serişdeleri üçin 140 müň sany kiçi molekulanyň ýokary geçiş barlagyny geçirdiler. Munuň üçin emeli aň bilen çäkli mukdarda molekulalaryň ýokary öndürijilikli barlag synaglaryny birleşdirýän işjeň okuw diýlip atlandyrylýan çemeleşme ulanyldy. Munuň netijesinde molekulanyň gurluşyna laýyklykda, onuň işjeňligini öňünden çaklamaga mümkinçilik berýän model döredildi.
Alymlar molekulýar gözleg meýdanynyň iki göterimini emele getirýän bary-ýogy 2880 birleşmäniň ýokary geçiş barlagyny geçirdiler. Dört aýlawyň netijesinde görlüp-eşidilmedik immunomodulýator häsiýetli molekulalar tapyldy. Şeýlelik bilen, kesel dörände bedeniň immun täsirini güýçlendirýän ýa-da peseldýän, ony işjeňleşdirýän, wiruslara garşy göreşmek üçin möhüm bolan kadalaşdyryjy täsiri artdyrýan molekulalar tapyldy.
Olaryň käbiri immun işjeňligini 110 göterim ýokarlandyrmaga, käbiri bolsa 128 göterim peseltmäge, käbiri wiruslara garşy göreş işjeňligini 83 göterim artdyrmaga ukyplydyr. Döredilen molekulalaryň biri çişlere garşy göreşde immuniteti gowulaşdyrmak üçin ulanylýan interferon-betanyň bölünip çykmagyny üç esse ýokarlandyrdy. Geljekki işlerde alymlar has-da peýdaly birleşmeleri almagy meýilleşdirýärler.
