Bütindünýä medeni we tebigy mirasy goramak baradaky Konwensiýa gatnaşýan döwletleriň Baş Assambleýasynyň 24-nji sessiýasynda geçirilen ses berişligiň jemi boýunça Gazagystan 2023 – 2027-nji ýyllar üçin ÝUNESKO-nyň Bütindünýä mirasy komitetine saýlandy. Bu barada ýurduň Daşary işler ministrliginiň metbugat gullugyna salgylanyp, vlast.kz habar berýär.
Gazagystan üçin 118 döwlet ses berdi. Onuň bilen bir hatarda Komitete ýene sekiz täze agza saýlandy: Wýetnam, Keniýa, Liwan, Koreýa Respublikasy, Senegal, Türkiýe, Ukraina we Ýamaýka.
Hökümetara Bütindünýä mirasy komiteti ÝUNESKO-nyň iň möhüm we abraýly dolandyryjy edaralarynyň biridir. Komitet medeni we tebigy obýektleri Bütindünýä mirasynyň sanawyna girizmek barada çözgüt kabul edýän 21 döwletden ybarat. Komitete agza bolmak medeni we tebigy mirasy gorap saklamak meselelerinde Konwensiýa gatnaşýan döwletleriň bilermenlik potensialynyň ösmegine ýardam edýär.
Ministrlik Gazagystanyň 2013 – 2017-nji ýyllarda komitetde netijeli iş tejribesiniň bardygyny we ýurduň “komitetiň mundan beýläkki işine-de öz mynasyp goşandyny goşmaga taýýardygyny” belledi.
