Samarkant 2025-nji ýylda ÝUNESKO-nyň Baş konferensiýasynyň 43-nji sessiýasynyň geçiriljek ýeri hökmünde saýlandy. Bu barada Parižde konferensiýanyň 42-nji sessiýasynyň başlygy Simona-Mirela Mikulesku habar berdi diýip, gazeta.uz belleýär.
Çäre 1985-nji ýyldan bäri ilkinji gezek guramanyň ştab-kwartirasynyň ýerleşýän ýeri bolan Pariž şäherinden daşynda geçiriler. Bellenilen ýylda konferensiýa Bolgariýanyň paýtagty Sofiýada geçirilipdi.
Belläp geçsek, 2021-nji ýylda ÝUNESKO-nyň agza döwletleriniň hiç biri Baş konferensiýany 42-nji sessiýasyny geçirmäge çagyrmandy, şonuň üçin onuň geçiriljek ýeri hökmünde Pariždäki ştab-kwartira saýlandy. Öňki konferensiýalar hem (41-nji sessiýa, 39-njy, 38-nji, 37-nji, 36-njy, 35-nji, 34-nji) teklipleriň bolmandygy sebäpli Fransiýanyň paýtagtynda geçirildi.
Özbegistanyň prezidenti Şawkat Mirziýoýew ähli daşary ýurtly dostlaryna we hyzmatdaşlaryna konferensiýany Samarkantda geçirmek baradaky taryhy çözgüdi goldandyklary üçin minnetdarlyk bildirdi.
“Sebitimizde ilkinji gezek geçiriljek bu möhüm global çäräniň Özbegistanyň we Merkezi Aziýa döwletleriniň ägirt uly siwilizasiýa potensialyny dünýä jemgyýetçiligine ýene bir gezek görkezmäge mümkinçilik berjekdigine ynanýaryn” – diýlip, döwlet Baştutanynyň metbugat gullugynyň habarynda aýdylýar.
