Eýranyň Yspyhan şäherinde Türkmenistanyň Medeniýet hepdeligi başlandy. Bu çäre 26-njy noýabra çenli dowam eder we oňa milli aýdym-saz, şekillendiriş sungatyna we senetçilige bagyşlanylyp guralýan sergileriň, çykyşlaryň çäklerinde 40-a golaý türkmen suratkeşleri gatnaşar diýip, Tehran Times habar berýär.
Medeniýet hepdeliginiň açylyş dabarasy Şäher sungat zalynda geçiriler. Yspyhan uniwersitetinde hem beýik türkmen şahyry we akyldary Magtymguly Pyragynyň ömrüne we döredijiligine bagyşlanan edebi sessiýa geçiriler.
Türkmenistanda Eýranyň Medeniýet günleri şu ýylyň fewral aýynda Aşgabatda geçirildi. Şonda ýurdumyza ellä golaý eýranly suratkeş, şeýle-de sungat ussatlary, döredijilik toparlary gelip, öz çykyşlaryny hödürlediler.
Ikitaraplaýyn çäreleriň geçirilmegi hormatly Prezidentimiz Serdar Berdimuhamedow bilen Eýranyň prezidenti Ebrahim Raisiniň duşuşygynda medeni gatnaşyklar babatynda gazanylan şertnamalaryň hataryna girýär.
Ýeri gelende bellesek, ýakynda Türkmenistanda Eýran Yslam Respublikasynyň uly ykdysady sergisi geçirilip, onda gurluşyk önümçiligi, oba hojalygy, maşyngurluşyk ýaly pudaklarda ýöriteleşen eýran kompaniýalary tanyşdyryldy. Şol bir wagtyň özünde ykdysady hyzmatdaşlyk boýunça türkmen-eýran hökümetara toparynyň mejlisi geçirildi.
