Maýa Kulyýewa adyndaky Türkmen milli konserwatoriýasynyň “Sazyň taryhy” kafedrasynyň uly mugallymy Leýla Babaýewa “Türkmen kompozitorlarynyň döredijiliginde Magtymgulynyň keşbi” atly ylmy monografiýany ýazdy. Bu barada “Türkmenistan: Altyn asyr” habar berýär.
Mugallym öz ylmy işinde saz eserleri Gündogaryň beýik şahyry we akyldary Magtymguly Pyragy bilen baglanyşykly bolan türkmen we daşary ýurt kompozitorlarynyň aýdym-saz eserlerini seljerýär. Olaryň arasynda Ýuliý Meýtusyň “Magtymguly” operasy, Aşyr Kulyýewiň “Magtymguly” simfoniki poemasy we Weli Muhatowyň “Magtymgulynyň ýadygärligine” atly 1-nji simfoniýasy bar.
Kitaba kompozitorlaryň dürli görnüşli saz eserleri, türkmen edebiýatynyň nusgawy şahyrynyň goşgularyna döredilen hor eserleri, aýdymlar we romanslar, şeýle-de “Magtymguly” filminiň sazy bar.
Ylmy-gözleg işiniň jemlemesinde netijeler we şahyryň goşgularyna döredilen saz eserleriniň sanawy hem-de peýdalanylan edebiýatlaryň sanawy getirilýär.
Monografiýanyň awtory munuň Türkmenistanyň saz medeniýetiniň taryhynda kompozitorlaryň döredijiliginde Magtymguly Pyragynyň şygryýeti bilen baglanyşykly ilkinji ylmy işdigini belleýär. Bu iş diňe bir ýurdumyzyň sazçylyk ýokary okuw mekdepleriniň talyplary üçin däl, eýsem şahyryň döredijilik mirasy bilen gyzyklanýanlar üçin hem peýdaly bolar.
“Ylym” neşirýaty tarapyndan çap edilen täze gözleg işi Magtymguly Pyragynyň doglan gününiň 300 ýyllygyna uly sowgat bolmak bilen, eýýäm sazçylyk ýokary okuw mekdebiniň kitaphanasynda mynasyp orun eýeledi.
