«Microsoft» «Wonka» filminiň çykmagyna bagyşlanan «şokoladdan» özboluşly «Xbox Series X» oýun konsoly toplumyny hödürledi. Bu barada habar kompaniýanyň web sahypasynda çap edildi.
Aksiýanyň çäklerinde «Microsoft» süýjülikleri we wideo oýunlaryny halaýanlara özboluşly sowgat toplumyny utmak mümkinçiligini berýär. Toplum şokolad plitkasy şekilinde dizaýn edilen «Xbox Series X» oýun konsolyny, biri şokoladdan ýasalan we hakyky bolmadyk üç sany oýun dolandyryş enjamyny (geýmpad), konditer dükanynyň tekjesi hökmünde şekillendirilen diregi, bäş sany şokolad trýufeli we üç aýlyk «Xbox Game Pass Ultimate» agzalygyny öz içine alýar.
Ýekeje nusgada çykarylan kolleksion toplum «X» sosial ulgamynda (öňki «Twitter») bije çekişlik arkaly sowgat berler. Bije çekişlige gatnaşmak üçin «Xbox-yň» resmi hasabyna ýazylmaly we ýazgyny paýlaşmaly. Ýeňiji 2023-nji ýylyň 25-nji dekabrynda yglan ediler. Bäsleşige «Xbox» bölüminiň resmi taýdan hereket edýän ýurtlaryndan ulanyjylar gatnaşyp bilerler.
«Wonka» filminiň surata 15-nji dekabrda çykmagyna garaşylýar. Ol 1971-nji ýylda çykarylan «Willy Wonka we şokolad fabrigi» filminiň prikweli bolar we onda keşbi Timoti Şalame janlandyrar.
