Russiýanyň we Germaniýanyň alymlary nusgawy saz eserlerine “dirižýorlyk etmäge” – yşaratlar, mimikasy we ses arkaly olaryň owazyny üýtgetmäge mümkinçilik berýän neýro ulgam döretdiler.
Ulgamda peýdalanylan model notalary bellige alýar we notanyň lokal tempi, ýerleşýän ýeri, dowamlylygy we sesiniň belentligi ýaly ýerine ýetiriş aýratynlyklaryny çaklap, çalmagy öwrenýär. Awtorlaryň belleýşi ýaly, olaryň döreden algoritmi saz gurallaryny çalmak ukyby bolmadyk adama ol ýa-da beýleki nusgawy sazyň nähirli ýerine ýetirilýändigine täsir etmäge mümkinçilik berýär. Ýagny neýro ulgam awtoryň görkezmelerini göz öňünde tutup, saz eserini döredýär. Şunda diňleýji dirižýor hökmünde çykyş edýär, onuň yşaratlary, mimikasy we sesi çylşyrymly eserleri ýerine ýetirýän “onlarça sazandanyň” işine gözegçilik edýär.
Şeýle hem alymlar aýdym-saz çykyşlaryna hakyky wagt birliginde dirižýorlyk etmäge we emeli intellekt ulgamlary bilen bilelikde, nusgawy eserlere özboluşly owaz bermäge mümkinçilik berýän ykjam goşundyny döretdiler. Alymlar bu goşundyny, şeýle hem smartfonyň kamerasyny we mikrofonyny ulanyp, Şopeniň mazurkalaryny (polýak milli tans sazy) hüwdä öwürmegi başardylar.
