2023-nji ýylda rapid we blitz boýunça dünýäniň küşt birinjiligi 26-njy dekabrdan 30-njy dekabr aralygynda Samarkantda (Özbegistan) geçiriler. Bu barada Halkara küşt federasiýasynyň (FIDE) prezidenti Arkadiý Dworkowiç aýtdy diýip, championat.com habar berýär.
“FIDE Özbegistanyň baý küşt däbini we onuň soňky döwürde küşt boýunça güýçli döwlete öwrülmegini ykrar edýär. Küşt üçin bu yhlas we maýa goýumlar bu abraýly çäräni geçirmegi Özbegistana tabşyrmaga iterdi” – diýip, FIDE-niň resmi saýty Dworkowiçiň sözlerini getirýär.
Ýatlap geçsek, 2022-nji ýylda çalt oýnalýan küşt boýunça dünýä çempionaty Almatada (Gazagystan) geçirildi. Zenanlaryň arasynda rapidde hytaýly Tan Çžuni ýeňiş gazandy. Blitzde Gazagystandan Bibisara Asaubaýewa ýeňiji boldy. Iki dissiplina boýunça açyk ýaryşda norwegiýaly grossmeýster Magnus Karlsen çempion boldy.
