FIFA-nyň habar bermegine görä, Ilgiz Tantaşewiň ýolbaşçylygyndaky özbegistanly eminler topary 2026-njy ýylda geçiriljek Dünýä çempionatynyň resmi eminleriniň sanawyna girizildi. Ýaryşda Tantaşew bilen bilelikde onuň kömekçileri Timur Gaýnullin we Andreý Sapenko hem işlärler.
Bu gezekki Dünýä çempionaty eminleriň sany boýunça taryha girer. Oňa 52 sany baş emin, 88 sany assistent we 30 sany VAR emini gatnaşar we bu görkeziji 2022-nji ýyldaky Katar çempionatyndakydan 41 emin köp diýmekdir.
Eminler korpusynyň ýolbaşçysy Pýerluiji Kollina sanawa alty sany zenan eminiň hem goşulandygyny belledi.
42 ýaşly Ilgiz Tantaşew 2013-nji ýyldan bäri FIFA-nyň emini bolup işleýär.
Ol halkara derejesinde uly tejribä eýe bolup, geçen ýyl Ýewropanyň we Günorta Amerikanyň iň güýçli toparlarynyň gatnaşmagyndaky Klublar arasyndaky dünýä çempionatynyň oýunlaryna-da eminlik etdi.
«Bu FIFA-nyň taryhyndaky iň uly eminler topary bolar. Olaryň her biri islendik wagt oýna bellenilmäge we çempionatyň ýokary derejede geçmegine goşant goşmaga taýýar bolmalydyr» diýip, Kollina aýratyn belledi.
