8-9-njy noýabrda Daşkentde Özbegistanyň Prezidenti Şawkat Mirziýoýewiň başlyklyk etmeginde Ykdysady Hyzmatdaşlyk Guramasynyň (YHG) 16-njy sammiti geçiriler.
Sammite Azerbaýjanyň, Eýranyň, Gazagystanyň, Gyrgyzystanyň, Pakistanyň, Täjigistanyň, Türkmenistanyň we Türkiýäniň döwlet we Hökümet Baştutanlarynyň gatnaşmagyna garaşylýar.
Sammitiň gün tertibine laýyklykda, YHG-nyň çäklerinde söwda-ykdysady, maýa goýum, ulag-kommunikasiýa we ynsanperwer ulgamlarda hyzmatdaşlygy mundan beýläk hem giňeltmegiň meseleleri ara alnyp maslahatlaşylar, şeýle hem bu köpugurly düzümiň işini kämilleşdirmegiň meselelerine garalar.
Çäräniň maksatnamasyna laýyklykda, döwlet Baştutanlarynyň ikitaraplaýyn duşuşyklary meýilleşdirilýär.
Belläp geçsek, Ykdysady Hyzmatdaşlyk Guramasy 1985-nji ýylda esaslandyrylyp, onuň sekretariaty Tähran şäherinde ýerleşýär.
