Pekin şäherinde Hyzmatdaşlyk boýunça hytaý-türkmen döwletara komitetiniň Ylmy-tehniki hyzmatdaşlyk boýunça kiçi komitetiniň 1-nji mejlisi geçirildi.
Mejlisde türkmen wekiliýetine Türkmenistanyň Ylymlar akademiýasynyň prezidenti Allaberdi Aşyrow, hytaý wekiliýetine bolsa, HHR-iň ylym we tehnologiýalar ministri Çžan Guanszun başlyklyk etdiler.
Taraplar ylym, tehniki we innowasiýa babatda Türkmenistanda we Hytaýda bar bolan mümkinçilikler bilen tanyşdylar hem-de bu ugurda ikitaraplaýyn hyzmatdaşlygy ösdürmegiň geljegine garadylar.
Gatnaşyjylar ylmy-barlaglarda özara gatnaşyk etmek, ylmy hünärmenleriň alşylmagy, iki ýurduň arasynda ylym we kiberhowpsuzlyk pudaklarynda hyzmatdaşlygy giňeltmegi ylalaşdylar. Mejlisiň jemlerine laýyklykda, degişli Teswirnama gol çekildi.
Hytaýyň paýtagtynda geçirilen mejlise türkmen wekiliýetiniň hatarynda Oguzhan adyndaky Inžener-tehnologiýalar uniwersitetiniň rektory Gurbanmyrat Mezilow, Ylymlar akademiýasynyň Tehnologiýalar merkeziniň direktory Durdymyrat Gadamow, Himiýa institutynyň direktory Hallymyrat Ataýew, Seýsmologiýa, fizika we daşky gurşawyň atmosferasy institutynyň direktory Güljemal Saryýewa, Magtymguly adyndaky Dil, edebiýat we milli golýazmalar institutynyň direktory Dawut Orazsähedow gatnaşdylar.
