Öň habar berşimiz ýaly, 29—31-nji oktýabrda Özbegistan Respublikasynda Türkmenistanyň Medeniýet günleri geçirildi. Döredijilik çäresi iki doganlyk halkyň medeni-ruhy taýdan has-da ýakynlaşmagyna we döwletara ynsanperwer gatnaşyklary täze derejä çykarmaga mümkinçilik berdi.
29-njy oktýabrda Daşkent şäherinde ýerleşýän Özbegistanyň Ýazyjylar birleşiginiň binasynda türkmen we özbek ýazyjy-şahyrlarynyň döredijilik duşuşygy geçirildi.
30-njy oktýabrda Daşkent şäherinde ýerleşýän Halkara maslahatlar merkezinde Türkmenistanyň Özbegistan Respublikasyndaky Medeniýet günleriniň açylyş dabarasy we konsert geçirildi.
Şol gün Özbegistanyň Döwlet konserwatoriýasynda iki ýurduň ugurdaş ýokary okuw mekdepleriniň wekilleriniň duşuşygy guraldy.
Medeni çäräniň jemleýji gününde — 31-nji oktýabrda Türkmenistanyň wekiliýeti Özbegistanyň gadymy şäherleriniň biri bolan Buhara şäherinde ýerleşýän we Magtymguly Pyragynyň bilim alan Gögeldaş medresesine baryp gördi.
Günüň ikinji ýarymynda Buhara şäherinde Türkmen halysynyň muzeýiniň hem-de haly dokalýan önümhananyň açylyş dabarasy boldy.
Şol gün Türkmenistanyň Özbegistan Respublikasyndaky Medeniýet günleriniň ýapylyş dabarasy boldy.
