TÜRKSOY-yň II Halkara teatr festiwaly ýurdumyzyň Aşgabat şäherinde geçiriler. Bu barada TÜRKSOY-yň Baş sekretary Sultan Raýewiň TÜRKSOY-yň I Halkara teatr festiwalyna bagyşlanan metbugat maslahatynda eden çykyşyna salgylanyp, Trend habar berýär.
“Bu yzygiderli bir festiwal bolar, ikinji festiwal Aşgabatda geçiriler. Türki dünýäsiniň teatr işgärlerini birleşdirmek festiwalyň maksatlarynyň biridir. TÜRKSOY-yň I Halkara teatr festiwalyna özleriniň iň gowy sahna eserlerini görkezjek alty ýurtdan toparlar gatnaşýar. Olar diňe bir hünärmenler däl, eýsem ýönekeý tomaşaçylar üçin hem gyzykly bolar. Festiwalyň maksatnamasyna girizilen sahna eserlerine abraýly eminler baha berer” – diýip, Sultan Raýew aýtdy.
Belläp geçsek, TÜRKSOY-yň I Halkara teatr festiwaly 31-nji oktýabrdan 4-nji noýabr aralygynda Şuşa we Baku şäherlerinde geçirilýär. Festiwal azerbaýjan halkynyň umumymilli lideri Geýdar Aliýewiň doglan gününiň 100 ýyllygyna, Şuşa şäheriniň 2023-nji ýylda “Türki dünýäsiniň medeni paýtagty” diýlip yglan edilmegine, Azerbaýjanyň professional milli teatrynyň 150 ýyllygyna we TÜRKSOY-yň 30 ýyllygyna bagyşlanýar.
Bu festiwala TÜRKSOY-a agza döwletlerden, şol sanda Türkmenistandan teatr toparlary gatnaşýar. Türkmenistandan Magtymguly adyndaky milli sazly drama teatry çykyş edýär. Şuşa şäherinde festiwalyň çäklerinde TÜRKSOY-yň agza döwletleriniň döwlet teatrlarynyň ýolbaşçylar Geňeşiniň 9-njy mejlisi geçirildi.
