Prezident Serdar Berdimuhamedow 8-9-njy noýabrda Özbegistan Respublikasynyň Daşkent şäherine geçiriljek Ykdysady Hyzmatdaşlyk Guramasynyň 16-njy Sammitine gatnaşar. Bu barada «Watan» habarlar gepleşiginde habar berildi.
Wise-premýer, daşary işler ministri R.Meredowyň mejlisiň barşynda belleýşi ýaly, häzirki wagtda ýurdumyz Ykdysady Hyzmatdaşlyk Guramasynda Başlyklyk edýär. Bu Guramanyň 15-nji Sammiti 2021-nji ýylyň 28-nji noýabrynda Aşgabat şäherinde geçirildi. Ýurdumyzyň başlyklyk eden döwründe Ykdysady Hyzmatdaşlyk Guramasynyň giňişliginde söwda-ykdysady, maýa goýum, ulag-logistika, energetika, şeýle hem medeni-ynsanperwer ulgamlarda özara bähbitli hyzmatdaşlygy işjeňleşdirmäge gönükdirilen degişli Konsepsiýa işlenip taýýarlanyldy.
Ykdysady Hyzmatdaşlyk Guramasynyň 15-nji Sammitiniň netijeleri boýunça Jemleýji resminama, ýagny Hereketleriň Aşgabat Konsensusy kabul edildi.
Ykdysady Hyzmatdaşlyk Guramasynyň nobatdaky 16-njy Sammitini 8-9-njy noýabrda geçirmek göz öňünde tutulýar. Bu ýokary derejedäki köptaraplaýyn duşuşygyň dowamynda Türkmenistan Ykdysady Hyzmatdaşlyk Guramasyndaky Başlyklygyny Özbegistan Respublikasyna geçirer.
