Geljek hepde 4-nji noýabrda Türkmenistanda nobatdaky ýaşyl ekologiýa çäresi — ählihalk bag ekmek dabarasy geçiriler. Bu barada Prezident Serdar Berdimuhamedow şenbe güni Hökümet mejlisiniň barşynda aýtdy.
Mejlisiň barşynda wise-premýer T.Atahallyýew ýurdumyzy bagy-bossanlyga öwürmek, täze tokaý zolaklaryny döretmek, şeýle hem Milli tokaý maksatnamasyny üstünlikli durmuşa geçirmek bilen bagly alnyp barylýan işler barada hasabat berdi.
Bellenilişi ýaly, häzirki wagtda güýzki bag ekmek möwsümine görülýän taýýarlyk işleriniň çäklerinde Arkadag we Aşgabat şäherlerinde hem-de ýurdumyzyň welaýatlarynda ählihalk bag ekmek dabaralaryny guramaçylykly geçirmek boýunça degişli işler alnyp barylýar. Hususan-da, bag nahallaryny hem-de olaryň ekiljek ýerlerini taýýarlamak boýunça zerur çäreler görülýär.
Serdar Berdimuhamedow ählihalk bag ekmek dabarasynyň ýokary guramaçylyk derejesini üpjün etmegi wise-premýere tabşyrdy.
