Türkmenistandan talyplar dürs ýazuw boýunça Central Asian Spelling Bee atly Merkezi Aziýa ýurtlarynyň sebitleýin bäsleşigine gatnaşmaga hukuk gazandylar, olar bäsleşigiň milli tapgyrynda ýeňiji boldular.
Şu ýyl Duşanbede (Täjigistan) geçiriljek sebitleýin bäsleşige Türkmenistandan dört ýeňiji çagyryldy. Iňlis dilini gowy bilýänleriň geljekki duşuşygynda biziň ýurdumyza Halkara Ynsanperwer ylymlary we Ösüş uniwersitetiniň hem-de Türkmen döwlet maliýe institutynyň iki talyby, şeýle-de Magtymguly adyndaky Türkmen döwlet uniwersitetiniň iki wekili wekilçilik eder.
Bäsleşigiň milli tapgyry ABŞ-nyň Aşgabatdaky ilçihanasy we Türkmenistanyň Daşary işler, Bilim we Medeniýet ministrlikleri bilen bilelikde geçirildi. Çäre Türkmenistanyň Döwlet medeniýet merkeziniň Döwlet kitaphanasynda ýurdumyzyň 20 ýokary okuw mekdebinden 70 talybyň gatnşmagynda geçirildi.
Bäsleşikde gatnaşyjylar iňlis dilini biliş derejelerini, dürs ýazuw başarnyklaryny, dilewarlyk ukyplaryny görkezmek mümkinçiligini aldylar.
Ýatlap geçsek, geçen ýyl Daşkentde (Özbegistan) geçirilen Central Asian Spelling Bee bäsleşiginde M.Garryýew adyndaky Türkmenistanyň Döwlet lukmançylyk uniwersitetiniň we Magtymguly adyndaky Türkmen döwlet uniwersitetiniň talyplary, degişlilikde, 1-nji we 2-nji orunlary eýelediler.
Spelling Bee bäsleşigine her ýyl dünýäniň dürli ýurtlaryndan müňlerçe talyp gatnaşýar. Bäsleşik ýaşlaryň arasynda iňlis dilini öwrenmäge bolan gyzyklanmany artdyrmaga, dilden we ýazuw üsti sözleýiş başarnyklaryny kämilleşdirmäge, şeýle-de okaýanlaryň dil sowatlylygyny artdyrmaga we olaryň söz baýlygyny giňeltmäge ýardam etmäge gönükdirilendir.
