Toyota Motor kompaniýasy toplumy düzüjileriň iberilmegi bilen bagly näsazlyklar sebäpli Ýaponiýadaky alty zawodynda 10 sany gurnama hatarynyň işini wagtlaýyn togtatdy. Näsazlyklar toplumy düzüjileri taýýarlaýjy kärhanada bolan partlamadan soň ýüze çykdy diýip, Kyodo habarlar agentligi habar berýär. Muny TASS ýetirýär.
Onuň maglumatlaryna görä, hatarlar 17-nji oktýabrda togtadylar. Olaryň işini gaýtadan dikeltmek baradaky çözgüdi ýakyn günlerde goşmaça kabul etmek göz öňünde tutulýar. Kömekçi kärhanada partlama 16-njy oktýabrda bolup geçdi. Iki işgär şikes aldy, olaryň biri hassahana ýerleşdirildi. Häzirki wagtda partlamanyň sebäpleri derňelýär.
Hadysanyň netijesinde Honsýu adasynyň merkezi bölegindäki Aýti we Mie prefekturalarynda ýerleşýän alty zawodyň işi togtadyldy diýen ýaly. Toplumy düzüjileri öndüriji kärhana Aýti prefekturasynda ýerleşýär. Toyota-nyň ýurduň çäginde 14 gurnama kärhanasy bar, olaryň önümi eksporta hem iberilýär. Togtadylan zawodlarda Toyota Land Cruiser we RAV4 ýaly modeller çykarylýar.
Toyota şu ýylyň birinji ýarymynda dünýäde 5,6 milliondan gowrak awtomobil öndürdi. Geçen ýylyň degişli döwri bilen deňeşdirilende önümçilik 10,3% ýokarlandy. 2023-nji ýylyň birinji ýarymynda kompaniýa 5,4 milliondan gowrak awtomobil satdy. Bu görkeziji boýunça ol eýýäm yzygiderli dördünji ýyl dünýäde birinji orny eýeleýär.
