Ýewropada ýaýlyma berilýän Arte nemes-fransuz teleýaýlymy 22-nji oktýabrda “Çöl çägelerindäki hazynalar – Türkmenistanyň gadymy mirasy” filmini görkezer. Bu barada ORIENT habar berýär.
Bu film türkmen topragynyň özboluşly ýadygärliklerine, şol sanda gadymy dünýäniň iň kuwwatly merkezleriniň biri bolan Margiana bagyşlanýar. Margiana şalygy ösen Mesopotamiýa we Müsür siwilizasiýalary bilen bir wagtda gülläp ösen hem bolsa, ol asyrlarboýy ýatdan çykaryldy. Diňe ýaňy-ýakynda arheologlar Garagum çölüniň ortasynda, şol wagtky Goňurdepe paýtagtynda köşk binalaryny we ajaýyp hazynalary tapdylar.
Belläp geçsek, Merw we Köneürgenç şäherleri Nisa bilen bir hatarda ÝUNESKO tarapyndan Bütindünýä medeni mirasynyň obýektleri diýlip yglan edildi.
Bürünç asyryndan başlap, häzirki Türkmenistanyň çäklerinde kuwwatly imperiýalar nähili döräpdir? Alymlaryň gözlegleri olaryň ilatynyň Hindistan, Ural we Ortaýer deňzi bilen-de aragatnaşyk saklandygyny görkezýär. Hytaý bilen Ýewropanyň arasyndaky ýüpek ýoly ençeme müňýyllyklaryň dowamynda dünýäniň iň möhüm söwda ýoly bolup, türkmen şäherlerini onuň taryhynda möhüm nokatlara öwürdi.
Ine, şularyň ählisi 2020-nji ýylyň oktýabr aýynda ilkinji gezek görkezilenden bäri Ýewropa ekranlarynda syýahat edýän germaniýaly dokumental film düşürijileriň “Çöl çägelerindäki hazynalar – Türkmenistanyň gadymy mirasy” filminde öz beýanyny tapýar.
