«Adobe Max» maslahatynda «Adobe» amerikan kompaniýasy birnäçe täze tehnologiki çözgütleri görkezdi, şolaryň hatarynda reňkini üýtgedýän zenan köýnegi hem bar.
Interaktiw «Project Primrose» köýnegi düwmä basylanda çeýe tekstil displeýleriniň kömegi bilen reňkini we ýüzündäki nagyşlary üýtgedip bilýär. Kompaniýa ozal şuňa meňzeş tehnologiýany görkezipdi, ýöne sergide tekiz mata we kiçijik ýantorba ulanyldy. Bu gezek tekstil displeýi köýnekde görkezildi.
Maslahatda «Adobe» kompaniýasynyň beýleki işläp düzmeleri, şol sanda suratlar bilen işlemegi aňsatlaşdyrýan «Project Stardust» tehnologiýasy görkezildi, ol obýektleri edil hersi aýry-aýry gatlaklardaky ýaly hereket etdirmäge mümkinçilik berýär. Şeýle hem bu tehnologiýa obýektler aýrylandan soň fony daşky gurşawa laýyklykda awtomatiki usulda dikeldýär. «Magic Editor» atly şuňa meňzeş funksiýa şu ýyl «Google» tarapyndan «Pixel 8» smartfonlary üçin hödürlendi.
«Project Poseable» adamyň suratyndan onuň 3D modelini döretmäge we olaryň hereketini dolandyrmaga mümkinçilik berýän tehnologiýadyr. Bu dürli pozalar we yşaratlar bilen synag etmek isleýän animatorlar we dizaýnerler üçin peýdaly bolup biler.
«Project Dub Dub Dub» tehnologiýasy gürleýjiniň sesini we intonasiýasyny saklap, wideolaryň dürli dillere terjimesini we olara ses berilmegini aňsatlaşdyrýar. Bu köp dilli kontent döretmek we auditoriýany giňeltmek üçin peýdaly bolup biler.
Umuman alanyňda, «Adobe» «Sneak» programmasyna birikdirilen we emeli intellektiň esasynda gurlan 11 tehnologiýanyň işleýşini görkezdi.
