Türkmenistanly talyplar Soçide (Russiýa) geçirilen maliýe howpsuzlygy boýunça III Halkara olimpiadasynyň ikinji derejeli diplomlaryna mynasyp boldular. Bu barada Orient habar berýär.
Deslapky saýlama tapgyry tamamlanandan soň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň we Türkmen döwlet ykdysadyýet we dolandyryş institutynyň talyplary jemleýji tapgyra gatnaşmaga hukuk gazandylar.
Olimpiadanyň jemleýji tapgyryna Türkmenistandan üç talyp gatnaşdy: Halkara ynsanperwer ylymlary we ösüş uniwersitetinden Begli Berdimyradow, Türkmenistanyň Daşary işler ministrliginiň Halkara gatnaşyklary institutyndan Meýlis Hojamyradow, Türkmen döwlet ykdysadyýet we dolandyryş institutyndan Daýanç Hydyrow. Olar bäsleşigiň jemi boýunça ikinji derejeli diplomlar bilen sylaglandylar.
Şeýle-de, ýurdumyzyň talyplary tematiki treninglere, interaktiw oýunlara gatnaşdylar hem-de maliýe howpsuzlygy boýunça hünärmenler bilen duşuşdylar. Şeýle-de, olar maliýe howpsuzlygyna ýöriteleşen ýokary okuw mekdepleri tarapyndan hödürlenýän mümkinçilikler bilen tanyş boldular.
