SpaceX kompaniýasynyň ýolbaşçysy Ilon Mask Bakuwda geçirilen 74-nji Halkara astronawtika kongresinde 2023-nji ýylyň abraýly IAF Bütindünýä kosmos baýragynyň eýesi boldy. Bu barada ixbt.com habar berýär.
Bu baýrak kosmos gözlegleri pudagynda dünýädäki iň abraýly baýraklaryň biri hasaplanýar, ol kosmos ylmynyň, tehnologiýalaryň, lukmançylygyň, kanunçylygyň ýa-da dolandyryşyň ösüşine goşan goşandy, şeýle-de bütin dünýäde kosmonawtikanyň ösüşine uly täsiri üçin şahsyýetleri ýa-da toparlary ykrar edýär.
Baýragy esaslandyryjylar Ilon Maskyň kosmosy özleşdirmäge goşan goşandy bilen tapawutlanandygyny belleýärler. Maskyň ägirt başlangyçlary, şol sanda köp gezeklik raketalaryň işlenip düzülmegi we SpaceX-iň kömegi bilen Marsda koloniýa döretmek boýunça meýilnamalar aerokosmos pudagyny üýtgedip, kosmosy özleşdirmegiň täze eýýamynyň başlangyjyny goýdy.
Topar üçin IAF Bütindünýä kosmos baýragy Jeým Uebb kosmos teleskopynyň (JWST) taslamasy boýunça bilelikdäki tagallary üçin NASA, Ýewropanyň kosmos agentligine (ESA) we Kanadanyň kosmos agentligine (CSA) berildi. SpaceX-iň söwda satuwy boýunça müdiri Stefani Bednarek kongrese gatnaşyp bilmedik Ilon Maskyň adyndan IAF Bütindünýä kosmos baýragyny kabul etdi.
