Fransiýada çaga dogluş derejesi ýurduň uruşdan soňky taryhy döwründe rekord pes derejä düşdi. Bu barada Milli statistika we ykdysady gözlegler institutyna (Insee) salgylanyp, TASS habar berýär.
“2022-nji ýylda Fransiýada 726 müň çaga dünýä indi, bu hem Ikinji jahan urşy tamamlanandan bäri iň pes görkeziji boldy” – diýlip, institutyň habarynda bellenilýär.
Sosiologlaryň maglumatlaryna görä, çaga dogluşynyň ýokary derejede azalmasy 25 – 34 ýaş aralygyndaky aýallaryň reproduktiw toparynda ýüze çykýar we bu ýagdaý Fransiýanyň ähli sebitlerinde diýen ýaly hasaba alynýar. Şol bir wagtyň özünde 40 ýaşdan uly aýallaryň arasynda çaga dogluş derejesi ýokarlanýar.
Statistika maglumatlaryna görä, soňky 10 ýylda Fransiýada eneleriň ortaça ýaşy 30-dan 31 ýaşa çenli ýokarlandy. Mundan başga-da, gözlegçiler çagalaryň 65%-iniň nikasyz doglandygyny, 2012-nji ýylda bu görkezijiniň 57% bolandygyny belleýärler.
Fransiýanyň ilaty 1-nji ýanwara çenli ýagdaýa görä 68 mln adama barabar.
