Tesla kompaniýasy Optimus atly android robotynyň üstünliklerini görkezýän täze wideony çap etdi. Wideoda görnüşine görä, robotyň fiziki mümkinçilikleri ep-esli ýokarlanypdyr. Mundan başga-da, Optimus has akylly bolupdyr - meselem, zatlary özbaşdak tertipläp bilýär.
Androidiň hereketleri has ýumşapdyr: Optimus indi islendik pursatda el-aýaklarynyň nirededigini anyk bilýär. Androidiň hereketleri ep-esli gowulaşypdyr - wideoda bir aýagynda durup, ýoga pozisiýalaryna meňzeş duruşy görkezýär.
Tesla ozal Optimus-yň, hatda, iň näzik zatlary hem almagy öwrenendigini habar beripdi. Indi, nerw ulgamlaryny ulanmak arkaly geçirilen okuwyň netijesinde, predmetleriň diňebir nirededigine düşünmek bilen çäklenmän, eýsem häsiýetli aýratynlygyna görä bir predmeti beýlekisinden tapawutlandyryp bilýär. Wideoda, meselem, android kubikleri ýuwaş-ýuwaşdan gutulara salýar, olary reňk boýunça tertipleýär we operator oňa päsgel berjek bolanda-da bulaşmaýar. Tesla munuň doly özbaşdak ýerine ýetirilýändigini nygtaýar. Edil şeýle usul bilen Optimus-a şuňa meňzeş beýleki meseleleri hem ýerine ýetirmegi öwredip bolar.
