Tesla kompaniýasy Tehasdaky we Frimontdaky zawodlarynda eýýäm bir müň töweregi adam şekilli Optimus robotlaryny ulanýar. Olar ýükleri daşamaga, akkumulýator öýjüklerini tertiplemäge we batareýalary ýygnamaga kömek edýär. Şol bir wagtyň özünde-de, olar öz başarnyklaryny kämilleşdirýär.
Üçünji nesil robotlary dürli obýektleri takyk tutmak üçin 22 erkinlik derejesine eýe bolan penjeli el, bilek herekete getirijisi we barmak datçikleri bilen üpjün edildi. Olar Tesla Autopilot-da ulanylýan FSD v15 arhitekturasynyň kömegi bilen okadyldy. Ulgam sekiz kameranyň kömegi bilen daş-töweregi seljermäge we täze ýumuşlary hepdeläp däl-de, birnäçe sagatda özleşdirmäge mümkinçilik berýär.
Ozal gumanoid robotlar giň gerimde ulanardan has gymmat hasaplanýardy. Häzir kompaniýa kämil konstruksiýanyň we programma üpjünçiliginiň netijesinde bir robot üçin 20 000 dollardan 30 000 dollara çenli baha derejesini gazanmaga çalyşýar.
Tehasda köpçülikleýin önümçilik üçin aýratyn zawod gurulýar: ýylyň ahyryna çenli 50 000 robot çykarmak meýilleşdirilýär. Şeýle-de, Optimus-yň hojalyk görnüşini döretmek mümkinçiligi öwrenilýär.
Kompaniýa robotlaryň giňden ornaşdyrylmagynyň önümçiligiň netijeliligini ýokarlandyrjakdygyny, ýöne robotlaryň özbaşdaklygy we komponentleriň könelmegi bilen bagly meseleleri çözmegi talap etjekdigini belleýär. Robotlary önümçilikde, logistikada, saglygy goraýyş ulgamynda, gurluşykda we beýleki ugurlarda ulanmak üçin çemeleşmeler hem işlenip taýýarlanýar.
