Ýaponiýanyň günorta-günbataryndaky Kumamoto şäherinde okuwçylaryň deregine robotlar sapaklara girer diýip, Mainichi Shimbun gazeti habar berýär. Muny rbclife.ru ýetirýär. Şeýlelik bilen ýerli bilim geňeşi mekdepde sapaklara girmezlik bilen göreşmäge synanyşýar.
Aslynda, androidler okuwçylaryň awatarlary bolup, olara uzak aralykdan sapaklara gatnaşmaga mümkinçilik berer. Robotlar jogap aragatnaşygy üçin dinamikaly mikrofonlar we kameralar bilen üpjün edilendir. Olaryň beýikligi bir metre golaý. Robotlaryň döşünde ýerleşdirilen planşetleri öýden dolandyryp bolýar. Çagalar synpdaşlary we mugallymlar bilen çekişmelere gatnaşyp bilerler.
“The Guardian” neşiriniň ýazmagyna görä, robotlar mekdebiň içinde hem hereket edip, dürli çärelere “gatnaşarlar”.
Taslamany noýabr aýynda işe girizmek we onuň netijelerine mart aýynda baha bermek meýilleşdirilýär. Onuň maksady sapaklara dolanyp barmakçy bolýan okuwçylaryň aladasyny azaltmakdyr. 2023-nji maliýe ýyly üçin goşmaça býujete eýýäm taslama üçin $10,55 müň möçberde çykdajylar girizildi. Taslamanyň çäklerinde iki robot döretmek meýilleşdirilýär.
Bu çäreler sapagy sypdyrmalaryň sanynyň artmagy bilen baglylykda kabul edildi. Ähtimal, olar koronawirus pandemiýasy bilen baglanyşyklydyr diýip, “The Guardian” ýazýar. 2018-nji okuw ýylynda olaryň sany 1283-di, 2022-nji ýylda bolsa 2760 okuwçy sapaklara gatnaşmady.
