Türkmenistanyň Prezidenti Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Mejlisiň gün tertibine harby we hukuk goraýjy edaralarynyň şu ýylyň sekiz aýynda alyp baran işleriniň netijeleri, şeýle hem Garaşsyz döwletimizde howpsuzlygy we asudalygy üpjün etmek, harby we hukuk goraýjy edaralaryň maddy-enjamlaýyn binýadyny pugtalandyrmak hem-de olaryň işini mundan beýläk-de kämilleşdirmek bilen bagly meseleler girizildi.
Hasabatlarda Türkmenistanyň Garaşsyzlygynyň 32 ýyllygy mynasybetli geçiriljek dabaraly harby ýörişe taýýarlyk görmek bilen baglanyşykly ýerine ýetirilýän işler barada aýdyldy.
Şeýle hem IIM-niň ýolbaşçysy däp bolşy ýaly, sentýabr aýynda geçirilýän “Ýol hereketiniň howpsuzlygy – ömrümiziň rahatlygy” atly biraýlygyň çäklerinde meýilleşdirilen çäreler barada hasabat berdi.
Serdar Berdimuhamedow mejlisiň dowamynda Türkmenistanyň kazylaryny we prokurorlaryny wezipä bellemek we wezipeden boşatmak hakyndaky resminama gol çekdi.
Döwlet Baştutany hasabatlary diňläp, ähli ulgamlarynyň maddy-enjamlaýyn binýadyny mundan beýläk-de pugtalandyrmagyň, olaryň işinde innowasion usullary we döwrebap tehnologiýalary işjeň ornaşdyrmagyň wajypdygyny belledi. Ulgamlarda öňdebaryjy tejribäni öwrenmäge hem-de ýokary derejeli hünärmenleri taýýarlamaga aýratyn üns bermek zerurdyr diýip, Serdar Berdimuhamedow aýtdy we mejlisiň gatnaşyjylaryna birnäçe anyk tabşyryklary berdi.
Döwlet howpsuzlyk geňeşiniň mejlisinde başga-da birnäçe meselelere garaldy we olar boýunça degişli çözgütler kabul edildi.
