Ýakynda Aşgabat atçylyk sport toplumynda at çapyşygynyň güýzki möwsüminiň açylmagy mynasybetli ýetginjek çapyksuwarlaryň gatnaşmagynda at çapyşygy geçirildi. Täze başlanan möwsümde 7 çapyşyk geçirilip, onda ýyndam bedewler öňe saýlandy.
At çapyşyklarynyň ilkinji tapgyrynda üç, dört we uly ýaşar bedewler 1400, 2000 we 2200 metr aralyklar boýunça ýaryşdylar. Birinji çapyşykda Türkmenistanyň Prezidentiniň Ahalteke atçylyk toplumyna degişli bolan Daýanjym atly dor at pellehana ilkinji bolup geldi. Ol bu aralygy 1 minut 56,7 sekuntda geçdi. 1400, 2000 we 2200 metr aralyklara guralan at çapyşyklarynda Türkmenistanyň Prezidentiniň Ahalteke atçylyk toplumyna degişli bolan Tarlaň atly akýal mele at (1 minut 40,7 sekunt), Gyzlarbeg atly gara bedew (1 minut 42,1 sekunt), Guwandyk atly al at (2 minut 31,5 sekunt), Kysmat atly dor at (2 minut 47 sekunt), Günhan atly dor at (2 minut 44,7 sekunt), Bezirgen atly akýal mele at bolsa (2 minut 36,2 sekunt) tapawutly netije görkezip, pellehanadan ilkinji bolup geçmek bilen, ýeňişlerini baýram etdiler.
Olarda ýeňiş gazanan bedewleriň şanyna baýraklar gowşuryldy.
