Germaniýanyň Mercedes-Benz we BMW awtoöndürijileri Mýunhende geçirilen IAA Mobility halkara sergisinde täze elektromobilleri hödürlediler. Bu barada CNBC teleýaýlymyna salgylanyp, interfax.ru habar berýär.
Ýekşenbe güni Mercedes-Benz kompaniýanyň geljekki elektromobilleriniň esasynda durjak täze arhitekturada Concept CLA Class konsept-karyny görkezdi.
Concept CLA Class-yň ýol ätiýajy 750 km bolup, 15 minut zarýad alandan soň 400 km çenli ýoly geçip bilýär.
BMW şenbe güni Vision Neue Klasse konsept-karyny hödürledi. Onuň arhitekturasy 2025-nji ýyldan öndürilip başlanjak elektromobiller üçin esas bolar.
Konserniň ýolbaşçysy Oliwer Zipseniň aýtmagyna görä, BMW şu ýyl elektromobilleriň satuwyny iki esse ýokarlandyrmagy maksat edinýär, ýylyň ahyryna çenli doly derejeli elektrik ulaglarynyň (BEV) global satuwlardaky paýy bolsa 15%-e ýeter.
Şeýlelik bilen, kompaniýalaryň ikisi-de içerki ýangyç hereketlendirijileri ýa-da gibridler bilen awtomobilleriň adaptasiýasyny göz öňünde tutan arhitekturadan elektrik platformalaryna geçýär diýip, teleýaýlym belleýär we muny elektromobil pudagynda çynlakaý ädim diýip atlandyrýar.
