«Çandraýan-3» hindi aý stansiýasynyň gonuş moduly Aýyň üstüne ýumşak gonuşy üstünlikli amala aşyrdy. Enjamyň Aýa gonuş operasiýasy Kosmos barlaglarynyň hindi guramasynyň (ISRO) saýtynda göni ýaýlymda berildi.
Gonuş 23-nji awgustda ýerli wagt bilen 18:03-de (aşg. 17:33-de) ýerine ýetirildi.
"Üstünlikli gonuş amala aşyryldy! Hindistan Aýda", - diýip, ISRO-nyň ýolbaşçysy Şridhar Somanath, enjam üstünlikli gonandan soň uçuşlary dolandyryş merkezinde eden çykyşynda belledi.
Ondan soň ol Hindistanyň Premýer-ministri Narendra Modä söz berdi. Modi ýaýlyma Ýohannesburgdan (GAR) wideoaragatnaşyk arkaly goşuldy. Ol ýerde ol BRIKS sammitine gatnaşýardy.
«Wikram» gonuş moduly Ýeriň tebigy hemrasyna 26 kilogramlyk «Pragýan» («parasat», «akyl ýetiriş») lunohodyny ýetirdi.
Hindistan ABŞ-dan, SSSR-den we Hytaýdan soň Aýa ýumşak gonuşy amala aşyrmagy başaran dünýäde dördünji ýurt boldy.
