Kazanly rus hünärmenleri saglyk ýagdaýyny anyklamak üçin enjam döretdiler. «Ebedilik kapsulasy» diýlip atlandyrylýan kürsi emeli intellekt we VR şlemy bilen bedeniň doly barlagyny geçirip bilýär diýip, lenta.ru habar berýär.
Bu enjamyň ýüregiň, bagryň, böwrekleriň, gan damarlarynyň we nerw ulgamynyň işini seljermäge, şeýle hem gan basyşyny, ýürek urgusyny, gandaky kislorodyň we şekeriň derejesini ölçemäge mümkinçilik berýändigi bellenilýär. Munuň üçin hassanyň kapsula meňzeýän kürsüde oturmagy ýeterlikdir. Neýrotor ulgamy alnan maglumatlara esaslanyp, iki minutda deslapky diagnozy kesgitlär we degişli hünärmene görünmek üçin teklipleri berer.
Enjam deriniň pigmentasiýasy, gözleriň aklary we hatda hassanyň sesi ýaly görkezijilere üns berýär. Şeýlelik bilen, soňky parametr boýunça algoritm ösüp gelýän keseli çaklap bilýär. Mundan başga-da, enjam massaž oturgyjy we kislorod maskasy hökmünde ulanylyp bilner.
Enjam bölek satuwa çykarmak meýilleşdirilmeýär. Enjam saglygy goraýyş ugurly kärhanalara, firmalara ýa-da edaralara satylyp bilner. Kürsi üçin häzirlikçe üç sany sargyt alyndy (kapsulanyň başlangyç bahasy 12 million rubla deňdir).
