Braziliýada uzyn öň aýaklary we uzyn ýiti dyrnaklary bolan gadymy süýrenijiniň galyndylary tapyldy. Alymlar ony «Edward – gaýçy eller» atly fantastiki filmiň gahrymany bilen deňeşdirdiler diýip, MIR24 habar berýär.
Santa Mariýa Federal uniwersitetiniň paleontologlary süýrenijiniň galyndylaryny Riu-Grande-du-Sul ştatyndaky şaly fermasynda ýüze çykardylar. Geçirilen barlaglar onuň 230 million ýyl ozal, Trias döwründe ýaşandygyny görkezdi.
Şeýle hem jandaryň mör-möjekleri, miweleri we hažžyklar ýaly ownuk haýwanlary iýmek üçin ulanan ullakan, ýiti tumşugy bolupdyr. Dyrnaklarynyň agaçlara dyrmyşmak üçin gerek bolan bolmagy mümkin.
Süýrenijä Venetorapter gassenae diýen ylmy at berildi. Alymlar skeletiň böleklerini seljerenlerinden soňra, onuň bedeniniň uzynlygynyň bir metre golaý bolandygyny kesgitlediler.
Süýrenijiniň bedeni ýeleklere meňzeş galyň sütük bilen örtülipdir. Ol pterozawrlaryň ata-babalary hasaplanýan lagerpetidler maşgalasyna degişli edildi. Alymlar Venetorapter gassenae-niň uzyn dördünji barmagyny gördüler – bu uçýan süýrenijiler bilen has ýakyn gatnaşygy görkezýän aýratynlykdyr (şeýle barmak bilen ganatlar goldanypdyr). Bu görnüş ýerüsti we uçýan süýrenijileriň arasyndaky aralyk görnüş bolup biler.
