«Luna-25» awtomat stansiýasynyň Ýeriň tebigy hemrasyna uçuşy dowam edýär. «Roskosmos-yň» metbugat gullugy kosmos gämisiniň kameralary arkaly alnan täze suraty paýlaşdy.
Bu gezek stansiýa Aýyň üstünde alnan ilkinji suraty bilen köpçüligi begendirdi. Aýyň arka tarapynda ýerleşýän günorta polýar krateri Zeeman-y surata aldy. Krateriň merkeziniň koordinatlary günorta giňişlige 75 gradus we günbatar uzaklyga 135 gradus laýyk gelýär.
“Ýerden görünmeýän Zeeman krateri Aýyň üstündäki üýtgeşik bir zat we gözlegçiler üçin uly gyzyklanma döredýär – onuň daş-töweregindäki gaçynyň beýikligi birneme tekiz düýbüň üstünden 8 kilometre ýetýär. Alnan suratlar bu krater barada häzirki bar bolan maglumatlaryň üstüni ep-esli doldurýar” - diýip Roskosmosda gürrüň berdiler
Aýyň aňry ýüzüniň dünýäde ilkinji suraty 1959-njy ýylyň oktýabr aýynda Sowet Soýuzynyň "Luna-3" awtomatiki stansiýasy tarapyndan alynypdy.
21-nji awgustda Boguslawskiý krateriniň demirgazygynda Ýeriň tebigy hemrasynyň ýüzüne ýumşak gonmak meýilleşdirilýär.
"Luna-25" awtomat stansiýasy ýumşak gonmak tehnologiýasyny işläp düzmeli, topragy almaly we seljermeli, uzak möhletli ylmy gözlegleri geçirmeli, Aýyň Günorta polýusynda ýerüsti regolitiň ýokarky gatlagyny we Aý ekzosferasyny öwrenmeli.
