Threads platformasy üstünlikli başlangyçdan soň auditoriýasyny ýitirmegini dowam etdirýär. Similarweb sanly seljeriş platformasynyň maglumatlaryna görä, programma bilen gatnaşyk 79%, ýagny iýul aýynyň başyndaky 2,3 mln işjeň ulanyjydan 7-nji awgusta çenli ýagdaýa görä Android gurluşly 576 müň ulanyja çenli peseldi.
Analitikleriň maglumatlary boýunça, amerikaly ulanyjylaryň Threads-da sarp edýän ortaça wagty 85% - 21 minutdan 3 minuta çenli azaldy. Üstesine-de, sosial ulgamy diňe bir adaty ulanyjylar däl, eýsem Selena Gomesiň Rare Beauty kosmetika kompaniýasy, Wendy’s tiz iýmit tory we Anthropologie dükany ýaly uly kompaniýalar hem ýuwaş-ýuwaşdan terk edýär.
Meta kompaniýasy tekst habarlary üçin Threads hyzmatyny 6-njy iýulda işe girizdi. Sosial ulgam amerikaly telekeçi Ilon Maska degişli bolan X-i (öň, Twitter) gysyp çykarmalydy. Programmada işe girizileninden ilkinji birnäçe sagatda 5 mln ulanyjy hasaba alyndy. Bäş günüň içinde auditoriýa 100 mln adama ýetip, ChatGPT-niň rekordyny täzeledi.
Platformada ulanyjylar 500 belgä çenli uzynlykdaky habarlary ýerleşdirip, olara salgylanmalary, suratlary we dowamlylygy 5 minuta çenli bolan wideolary berkidip bilýärler. Threads-a Instagram akkauntyň bilen girmek bolar. Ýöne platformadaky profiliňi diňe Instagram akkauntyňy bozmak arkaly işjeňsizlendirip bolýar.
