Gyrgyzystan 2027-nji ýyldan başlap polimer plýonkadan we plastik önümlerinden ýasalan paketleriň önümçiliginden, satuwyndan we mugt berilmeginden ýüz öwrer. Şeýle kanuna ýurduň prezidenti Sadyr Žaparow gol çekdi. Muny döwlet baştutanynyň metbugat gullugyna salgylanyp, Interfax.ru ýetirýär.
2027-nji ýylyň 1-nji ýanwaryndan ýurduň ähli territoriýasynda polimer plýonkadan we plastik önümlerinden ýasalan paketleriň önümçiligi (eksport üçin öndürilýän paketlerden, tutawaçlary ýok we gündelik durmuşda ulanmak üçin satylýan biodargaýan polimer materiallaryndan ýasalan paketlerden başga), bu önümleriň söwdada we hyzmat pudagynda satuwy we berilmegi gadagan ediler.
Kanunyň resmi taýdan çap edilen gününden başlap 15 günden soň Issyk-Kul sebitiniň şypahana-dynç alyş zolagynda polimer plýonkadan ýasalan paketleriň we plastik önümleriniň ähli görnüşiniň doly dolanyşygy gadagan edilýär. Mundan başga-da, Gyrgyzystanyň aýratyn goralýan tebigy we biosfera sebitlerinde söwdada we hyzmat pudagynda polimer plýonkadan we plastik önümlerinden ýasalan paketleriň getirilmegine, ulanylyşyna, satuwyna we mugt berilmegine gadaganlyk girizilýär.
Respublikanyň aýratyn goralýan tebigy we biosfera sebitlerinde 2024-nji ýylyň 1-nji ýanwaryndan başlap, plastik önümlerini we polimer plýonkadan paketleri öndürmek gadagan edilýär.
Kanunda dolanyşykda gadagan edilen plastik önümleriniň sanawy kesgitlenen: bir gezeklik plastik gap-gaçlarynyň ähli görnüşleri; iýmit üçin bir gezeklik plastik gaplama, PET plastik çüýşe, ýumurtgalar üçin plastikden bir gezeklik gaplama; plastik kofe kapsulalary, önüm torbasy.
Kanun resmi taýdan çap edileninden 15 günden soň güýje girýär.
