2023—2024-nji okuw ýylynda türkmen raýatlarynyň 330-sy 23 sany belarus ýokary okuw mekdeplerinden okamak üçin çakylyk aldylar. Bu maglumatlary Belarus Respublikasynyň Türkmenistandaky ilçihanasy resmi saýtynda çap eden sanawynda getirdi.
Şu ýyl Belarus döwlet uniwersitetiniň A.D.Saharow adyndaky Halkara döwlet ekologiýa institutyna 92, Belarus döwlet uniwersitetiniň özüne — 79 türkmen dalaşgäri girdi. Türkmenistandan 35 dalaşgär Ý.Kupala adyndaky Grodno döwlet uniwersitetine girdi. F.Skorina adyndaky Gomel döwlet uniwersitetine 31 dalaşgär girdi.
Belarus döwlet lukmançylyk kollejine, P.M.Maşerow adyndaky Witebsk döwlet uniwersitetine, Weterinar lukmançylygy Witebsk döwlet akademiýasyna, Grodno döwlet obahojalyk uniwersitetine, Belarus döwlet obahojalyk akamdemiýasyna we A.A.Kuleşow adyndaky Mogilewsk döwlet uniwersitetine Türkmenistandan bir talypdan girdiler.
Türkmenistanlylar Belarusuň 6 sany lukmançylyk, 4 sany tehniki, 3 sany obahojalyk we 7 sany köpugurly ýokary okuw mekdeplerine girdiler. Çakylyk alanlaryň sanawy we okuwa barmagyň ahyrky senesi bilen şu salgydan tanşyp bilersiňiz.
Soňky maglumatlara görä, Belarus Respublikasynda häzir alty müňden gowrak türkmen raýaty bilim alýar.