Golfstrim akymy eýýäm 2025-nji ýylda ýitip biler we bu weýrançylykly klimat hadysalaryna sebäp bolar diýip, «mail.ru» «The Guardian» gazedine salgylanyp habar berýär.
Golfstrim Atlantik ummanyndaky ýyly deňiz akymydyr we ol Ýer planetasynda ýylylygyň ýaýramagynda esasy wezipeleriň birini ýerine ýetirip, klimata ägirt uly täsir edýändir. Çeşmede bellenilmegine görä, global ýylylyk sebäpli bu akym soňky 1600 ýyl bäri iň pes derejesinde saklanýar. Eýýäm 2021-nji ýylda Golfstrimiň rekord derejede haýallandygy hasaba alnypdy.
Geçirilen barlaglara görä, eger atmosfera goýberilýän uglerodyň möçberi azaldylmasa, 2050-nji ýyla çenli global derejeli klimat betbagtçylygy bolup biler. Bu akym 12 müň ýyl bäri hereket edip gelýär, onuň işiniň bozulmagy Hindistana, Günorta Amerika we Günbatar Afrika ýagyş ýagmagynyň kesilmegine, Ýewropada harasatlaryň köpelmegine hem-de howanyň sowamagyna, deňziň derejesiniň ýokarlanmagyna, şeýle hem Amazonka tokaýlarynyň we Antarktidanyň buz örtüginiň ýok bolmagyna getirip biler.
