Penşenbe güni Kazan Kremliniň diwarlarynyň golaýyndaky Müňýyllyk meýdançasynda «Ýüpek ýoly 2023» halkara rallisine badalga bermek dabarasy geçirildi. Türkmenistanyň Awtomobil sporty federasiýasynyň topary hem 13-nji gezek geçirilýän «Ýüpek ýoly» halkara awtorallisine gatnaşýar.
Kazan şäherinde badalga alan awtorallä Merdan we Şöhrat Toýlyýewler, Maksatmyrat Daňatarow, Didar Orazmedow, Begenç Annaýew, Muhammetmyrat Gurbanow “Nissan Patrol” awtoulagynda, Süleýman Annamämmedow, Parahat Garlyýew “Toyota LC 200” awtoulagynda ýurdumyza wekilçilik edýärler.
Kazandan badalga alyp, Moskwa şäherinde tamamlanjak, Russiýanyň 13 sebidiniň çäginden geçýän awtorallä dünýäniň 23 ýurdundan 98 ekipaž gatnaşýar.
Awtoralliniň iň ýokary “Ak gaplaň” baýragyny almak ugrunda bäsdeşler jemi 5 müň 241 kilometr ýol geçerler. Şonuň 2 müň 277 kilometri ýokary tizlikde geçiler. “Ýüpek ýoly” halkara awtorallisi sebitde iň iri awto sport ýaryşlarynyň biridir.
