29-njy iýunda Mekge şäherinde haj parzyny berjaý etmek üçin Saud Arabystany Patyşalygynda saparda bolýan türkmen halkynyň Milli Lideri Gurbanguly Berdimuhamedowyň we Özbegistan Respublikasynyň Prezidenti Şawkat Mirziýoýewiň arasynda telefon arkaly söhbetdeşlik boldy.
Özbek Lideri Gurbanguly Berdimuhamedowy doglan güni bilen tüýs ýürekden gutlap, berk jan saglyk, uzak ömür we işinde uly üstünlikleri arzuw etdi. Şeýle hem Özbegistan Respublikasynyň Prezidenti türkmen halkynyň Milli Liderini sanly çözgütler we iň täze tehnologiýalar ornaşdyrylan “akylly” Arkadag şäheriniň birinji tapgyrynyň açylmagy bilen gutlady.
Söhbetdeşligiň dowamynda Gurbanguly Berdimuhamedow Prezident Şawkat Mirziýoýewiň uly şahsy goşandyny nygtap, soňky ýyllarda doganlyk Özbegistanda ýurdy ösüşiň täze basgançagyna çykaran ägirt uly durmuş-ykdysady özgertmeleriň amala aşyrylandygyny belledi. Özbegistan köp ulgamlarda uly üstünlikler gazandy, halkara giňişlikde onuň abraýy barha artýar, halkyň abadançylygy yzygiderli ýokarlanýar diýip, Gurbanguly Berdimuhamedow aýtdy we dostlukly döwletiň Baştutanyna şu ýylyň 9-njy iýulynda geçiriljek Prezident saýlawlarynda üstünlik arzuw etdi.
