8-nji iýunda Türkmenistanyň Döwlet ministri — «Türkmengaz» döwlet konserniniň başlygy M.Babaýewiň ýolbaşçylygyndaky Türkmenistanyň wekiliýeti Pakistanyň Premýer-ministri bilen duşuşdy. Bu barada türkmen daşary syýasat edarasynyň saýty habar berýär.
Duşuşykda türkmen tarapy Premýer-ministri, Türkmenistan bilen Pakistanyň arasyndaky iri bilelikdäki taslamalary durmuşa geçirmegiň gidişi barada maglumat berdi.
Pakistanyň Premýer-ministri, Pakistanyň energiýa zerurlygyny kanagatlandyrmakda möhüm orun eýelejek TOPH gaz geçirijisi we TOP elektrik geçirijisi taslamalaryny Pakistanyň hökümetiniň doly goldaýandygyny tassyklady.
Duşuşykdan soňra Premýer-ministriň gatnaşmagynda, TOPH gaz geçirijisi taslamasynyň durmuşa geçirilişini tizleşdirmek boýunça ýerine ýetirilmeli çäreleriň bilelikdäki Meýilnamasyna gol çekildi.
Premýer-ministr gol çekmek dabarasynda çykyş edip, TOPH taslamasynyň sebitiň ösüşi üçin örän möhüm taslamadygyny we sebitleýin hyzmatdaşlyk döwrüni getirjekdigini aýtdy.
Türkmenistanyň wekiliýetiniň Pakistana saparynyň dowamynda, TOPH gaz geçirijisi we TOP elektrik geçirijisi taslamalary boýunça tehniki hünärmen derejede netijeli duşuşyklar hem geçirildi.
