Şu gün, 7-nji iýunda Türkmenistanyň Prezidenti Serdar Berdimuhamedow harby we hukuk goraýjy edaralarda şu ýylyň bäş aýynda ýerine ýetirilen işleriň netijeleri boýunça Döwlet howpsuzlyk geňeşiniň nobatdaky mejlisini geçirdi.
Mejlisiň barşynda harby we hukuk goraýjy edaralaryň ýolbaşçylary garamagyndaky edaralaryň şu ýylyň ýanwar-maý aýynda alyp baran işleriniň netijeleri barada hasabat berdiler.
Döwlet howpsuzlyk geňeşiniň sekretary, goranmak ministri B.Gündogdyýew Milli goşuny döwrebap tehniki serişdeler bilen üpjün etmek, işgärler kuwwatyny pugtalandyrmak hem-de ýaş esgerleri watançylyk ruhunda terbiýelemek boýunça alnyp barylýan işler barada habar berdi.
Baş prokuror S.Mälikgulyýew Türkmenistanyň Prezidentiniň ozal beren tabşyryklarynyň ýerine ýetirilişi hem-de birnäçe ministrlikleriň we pudaklaýyn dolandyryş edaralarynyň işine geçirilen barlaglaryň netijeleri barada hasabat berildi.
Içeri işler ministri M.Hydyrow hukuk tertibini üpjün etmek, paýtagtymyzyň hem-de welaýatlaryň awtomobil ýollarynda ulaglaryň gatnawlaryny kadalaşdyrmak boýunça görlen çäreler barada hasabat berdi.
Ýokary kazyýetiň başlygy B.Hojamgulyýew kazyýet ulgamyny kämilleşdirmek boýunça ýerine ýetirilen toplumlaýyn işler, işgärleriň hünär derejesini ýokarlandyrmak, sanly tehnologiýalary ornaşdyrmak we olary gündelik işde ulanmak boýunça amala aşyrylýan çäreler barada hasabat berdi.
Milli howpsuzlyk ministri N.Atagaraýew ýurdumyzda kadaly jemgyýetçilik ýagdaýyny üpjün etmek boýunça ýylyň başyndan bäri görlen çäreler barada hasabat berdi.
Döwlet serhet gullugynyň başlygy Ý.Nuryýew Watanymyzyň serhetlerini goramak boýunça görlen toplumlaýyn çäreler barada hasabat berdi.
Adalat ministri M.Taganow milli kanunçylyk binýadyny hemmetaraplaýyn ösdürmek babatda görlen çäreler, degişli ösüş Maksatnamasynyň durmuşa geçirilişi, barada hasabat berdi.
Döwlet gümrük gullugynyň başlygy M.Hudaýkulyýew ýolbaşçylyk edýän düzümleriniň işiniň netijeliligini ýokarlandyrmak boýunça ýylyň başyndan bäri görlen çäreler barada hasabat berdi.
Döwlet migrasiýa gullugynyň başlygy B.Wolsahatow edarany ösdürmegiň Maksatnamasyny ýerine ýetirmek, onuň işini kämilleşdirmek, işgärleriň hünär derejesini ýokarlandyrmak boýunça görlen çäreler barada hasabat berdi.
